Baydhabo''Qorshe Ismaamul Goboleed loogu sameynayo Ilaa Lix Gobol oo ku yaal Koonfurta Soomaaliya ayaa ka socda Magaalada Baydhabo.

Baydhabo''12-may-2008(Arlaadiimedia)Waxaa si xoogan Magaalada Baydhabo uga soconaya qorshayaal balaaran oo lagu doonayo in Ilaa Lix gobol Ismaamul Goboleed loogu dhiso.

Qorshahan siyaasadeed ayaa waxaa wada Xildhibaanada ka soo jeeda Ilaa Lix Gobol oo ku yaala Koonfur Soomaaliya, kuwaasoo doonaya in ay dib usoo nooleeyeen Maamul Goboleedkii Koonfur Galbeed ee Soomaaliya.

Magaalada Baydhabo oo ay shalay kulan xasaasi ah ku yeesheen 100 ruux oo ka soo jeeda Beelaha Digil & Mirifle ayay kaga hadleen arrimo dhowr ah oo ay ku jirto sidii ay isu cafin lahaayeen, isla markaana ugu midoobi lahaayeen dhismaha Maamul Goboleedkaas.

Guddoomiyaha Baarlamaanka Sheekh Aadan Madoobe ayaa waxaa uu sheegay in loo baahan yahay in dib loo soo nooleeyo Dowlad goboleedkii Koonfur Galbeed mar uu ka qeyb galay Kulan ay yeesheen Xildhibaanada ka soo jeeda Lix Gobol.

Gobolada Baay, Bakool, Jubada Hoose, Jubada Dhexe iyo Sh/Hoose ayaa la sheegay in la doonayo in maamul loogu dhawaaqo, kaasoo loogu magac darayo Maamul Goboleedka Koonfur Galbeed Soomaaliya, oo horay madax uga ahaan jiray Shaati Gaduud oo hada ah Xildhibaan ka tirsan Baarlamaanka.

Xildhibaanada ka soo jeeda Goboladaas ayaa doonaya in si meesha looga saaro is jiid jiidka Maamulada in Goboladaas loo sameeyo hal hogaan oo isku dhaf ah.